5.17.2017

Rama “junior”, koka hashashi dhe Rama “major”

u2_abdurahim

Nga Abdurahim Ashiku

Rama Junior, alias Luan M. Rama, në thuajse në të gjitha daljet publike por përdor “lopatën” për ta hedhë “hashashin” në arat e Rama Major, alias Edi Rama, kryeministër. “Shatin” nuk e do askush kur është fjala për ta përdorë për një problem kaq të madh që lidhet me kultivimin dhe trafikimin e një bime të “mallkuar”. Ai përdoret vetëm kur është fjala për të mbledhë fitime e për të grumbulluar rreth vetes vota dhe votues. Në këtë mes beteja midis Ramës Junior dhe Ramës Major, dy Rama-ve në koalicion duket se është e fituar nga i pari. Për një arsye të vetme se Rama “Major” hesht i frikësuar se mos një ditë Rama Junior do të dalë e të thotë i presim lidhjet dhe…Qeveri Teknike. Hashashi në Shqipëri “kultivohet” nga Rama Junior, në fushat dhe malet e dhëna në administrim për tu qeverisur nga partia e tij, Lëvizja Socialiste për Integrim. Ministri i bujqësisë Edmond Panariti është një ndër figurat më të larta të Lëvizjes Socialiste për Integrim. Në fushat e kodrat nën administrimin e tij mbillet hashash. Si ministër ai ka një “ushtri” të tërë specialistësh që nuk ka se si mos shohin (madje edhe të jenë pjesë) në kultivimin e hashashit. Deri sot nuk kemi dëgjuar që ministri dhe vartësit e tij të flasin për “arat” ku kultivohet kanabis sativa apo bimë të tjera narkotike. “Arat” ja ngjisin z. Rama Major… Ministri i Mjedisit dhe Pyjeve Lefter Koka është një ndër figurat më të larta të Lëvizjes Socialiste për Integrim. Në kodra dhe male, siç kemi parë nga fotografimet ajrore, mbillet masivisht kanabis sativa. Kokën e Ministrisë së Mjedisit dhe të Pyjeve e kemi parë ti kundërvihet Ramës Major deri në kërkesën për dorëheqje për shkak të kultivimit të bimëve narkotike në pyjet e tij. Shqipëria ka një sipërfaqe të madhe pyjore që i është dhënë për ta administruar dhe mbrojtur deri në bimën më të vogël Ministrisë së Mjedisit me Lefter Kokën në krye dhe një armate të tërë nëpunësish të mëdhenj e të vegjël që nga drejtorët në qendër, në rrethe, në komuna e deri tek rojtarët (policët me uniformë të gjelbër) e pyjeve me nivel arsimor inxhinier pyjesh dhe teknik pyjesh. Në faqen zyrtare të Ministrisë së Mjedisit ka dy drejtori zëri i të cilave duhet të kishte dalë nga gurmazi për kultivimin në pyje e male të hashashit; Drejtoria e Mbrojtjes dhe Trajtimit të Pyjeve dhe Inspektorati Shtetëror i Mjedisit dhe Pyjeve. Sa është kjo armatë në logjistikë dhe në persona fizikë nuk e di, por jam i sigurt se ata janë më shumë se sa policët e Tahirit që korrin e djegin hashashin në “arat” e Lefter Kokës dhe të Lëvizjes Socialiste për Integrim. Rama Junior i sugjeron policisë që të mos merret me korrjen e hashashit. Sugjerim i mençur. Por kush do të merret me këtë punë në qoftë se policia tërhiqet? Rama Junior nuk jep alternativë. Kjo sepse atëherë kjo gjë duhet të ishte bërë (dhe të bëhet) nga vetë ministri Koka dhe armata e tij në terren, nga vetë ministri Panariti dhe drejtoritë e bujqësisë në vartësi të tij në terren. “Shati” në këtë rast do ta tërhiqte hashashin në oborrin e Lëvizjes Socialiste për Integrim gjë që do ti komplikonte gjërat dhe koalicioni i çarë ose do të ndahej si është ndarë kontinenti amerikan me atë evropian miliona vjet më parë ose do të ishte bashkuar e ngjitur fort për të marrë përsipër përgjegjësitë e për të qenë NJË në sfidat e ditës, gjë që kalon nëpërmjet shumë pikëpyetjeve. Nuk është i vetmi zë Rama Junior në ndenjësen e “ekskavatorit politik” të “pjesës në koalicion” që po “mbledh mullar” me ruspë në oborrin e Ramës Major cannabis sativën dhe trafikantët nga toka, deti dhe ajri. Ka edhe të tjerë, deputetë, ministra, drejtorë që i sheh këto ditë anë e kënd Shqipërisë diku me “shatë në krah” e diku me “ruspë në gjoks”. Sot Rama Junior u pa të hedhë në oborrin e Rama Major një tjetër thagmë: Hashashi i kapur është asgjësuar pa proces-verbal, pa praninë e prokurorisë, pa…” Fushatë e ashpër zgjedhore e Ramës Junior mbi Ramën Major… Me dashuri dhe qetësi…

No comments:

Post a Comment